立法會有名你叫「垃圾會」，梗係日日烏煙瘴氣，穢不可聞嘅喇，最近立法會大樓更變身無牌賓館添，點止阿豬阿狗自出自入，連嫌犯、黑社會大佬都可以長驅直進，沖涼過夜又得，非法指揮佔領又得，問你服未！
嗱，日前雙學吹雞，將佔領行動升級，涉嫌煽動暴徒圍堵政總，與警方血戰連場，好彩邪不能勝正，最終都係徒勞無功。但最離奇嘅係，暴徒衝鋒陷陣、打生打死嗰陣，雙學領袖竟然無影無蹤，被指當逃兵。究竟佢哋匿埋邊度呢？有人眼利，睇到佢哋去咗立法會大樓指點江山兼過夜避亂呀。
堂堂立法會，居然藏污納垢，淪為佔領搞手嘅指揮總部，你話成何體統呀？講到呢度，大家一定會問，立法會有保安o架，點可以好似無掩雞籠咁，畀人肆意進出搞搞震嘅呢？答案好簡單，多得反對派政客開門揖犯，引狼入室囉。長毛梁國雄承認，係佢邀請佔領搞手入立法會嘅，不過佢唔係認衰，仲反咬一口，話建制派都可以帶人上立法會「探訪」，點解佢哋就唔得？
喂，有冇搞錯呀。議員邀請市民入立法會唔係話唔得，但點都要有規有矩o架，係人都知，佔領行動係非法霸道，佔領搞手係戴罪之身，邀請嫌犯入立法會，點止窩藏嫌犯咁簡單，直情有互相勾結、裏應外合之嫌。是可忍，孰不可忍！民意壓力之下，立法會行政管理委員會終於做嘢，向三大搞事政客發出警告信。行管會更即時對議員助理及訪客實施新規定，包括限制使用會議室嘅時間，除非有議員在場，否則訪客不准在立法會過夜；議員助理亦只可進出所屬樓層，不得前往其他樓層等等。
話時話，立法會亂成咁，當局長期姑息養奸，難辭其咎，家陣先發警告信及實施新規定，遲唔遲啲吖！唔係咩，唔少政客慷納稅人之慨，將立法會當做自己款客嘅私人會所，鍾意帶咩人就帶咩人，鍾意做乜就做乜，引狼入室都唔係第一次啦，有人喺立法會「玩升降機」阻止別人出席會議，有人帶同示威者衝擊立法會，有人指引示威者圍堵停車場出入口，咁仲唔止，床褥、沐浴用品甚至安全套都出現喺立法會大樓，簡直不知所謂，離晒大譜喇！
大家有眼見，政客唯恐天下不亂，議會內，大搞不合作運動，唔係拉布，就係流會；議會外，同佔領搞手沆瀣一氣，仲同黑社會大佬公開勾勾搭搭添，搞到議會癱瘓，政府停擺，社會空轉，香港沉淪，市民早就忍無可忍。計功夫茶話齋，善惡到頭終有報，與民為敵者，決無好下場！