台灣日前舉行「九合一」選舉，香港多個政黨都派人赴台偷師，咁啱香港緊接明年起舉行多場全港性選舉，各黨派大可學以致用。有建制派中人話，其實佢哋早年曾向台灣取經，呼籲選民按出生年月日或身份證號碼等方式配票，可惜支持者連點樣投票都唔識，又或者同家人胡亂配票，所以呢個配票方法最後都係無疾而終。
台灣選舉其中一種配票方法，係選民按其出生年月日，或身份證號碼最後數字嘅單雙數，分別投票畀心儀政黨嘅候選人，確保所屬政黨唔會有人高票落選，齊齊保送入局。據知香港有建制派大黨都研究過以呢招配票，可惜香港選舉歷史始終唔及台灣悠久，政黨政治亦唔成熟，淨係用蓋印投票都經常出錯，變成問題選票或廢票，如果仲玩埋「數字配票」肯定錯漏百出。
建制派為咗令選民準確投票及配票，可謂出盡法寶。好似民建聯就喺前年立法會選舉出動「掌心雷」，喺長者選民手掌上貼上印有該黨候選人嘅名單號碼，務求一票都不能少。另外，建制派亦喺地區宣傳策略着手，好似兩名同區嘅立法會議員，就將選區一拆為二，各區橫額只容許其中一人「嘜頭」現身，雖然有助配票，但缺點就令議員知名度長期喺低位徘徊。