政情：大廈水力發電 好「洗」好用
身兼惜食督導委員會成員嘅信和置業執行董事黃永光（Daryl）向來講求環保，有次被老婆話佢沖涼沖得耐嘥水，令佢忽發奇想，諗點樣可以將大廈內水流水壓轉化成電力，成為再生能源。Daryl於是搵咗理工大學及一間工程顧問公司合作，研發新一代全港首個大廈水力發電系統，利用食水管水流產生嘅水壓推動渦輪發電，應用喺日常照明。
效能提升六倍 用作照明
信和尋日舉行發布會，介紹有關水力發電系統，系統現時安裝喺奧海城二期嘅水錶房內，屬第二代研發，發電效能較第一代提升六倍，增至每小時可產電一百瓦，每個裝置成本約十二萬元。若以每盞LED燈耗電量為六點五瓦，即可同時令十五盞LED燈亮起，相等於每年節省約一千三百元電費；而每年減碳量約七百公斤，相當於種植約三十棵樹。Daryl仲趁機賣廣告，話有關技術將應用喺旗下新樓盤，供電畀電梯大堂照明。