泛民主派立法會議員「突襲」取得財務委員會轄下工務及人事編兩個小組委員會嘅控制權後，建制派議員紛紛「補飛」申請逾期加入兩個小組。分別由泛民議員梁家傑及梁繼昌（Kenneth）任主席嘅工務同人事編制小組就選擇開特別會議處理有關申請。可惜兩個小組開咗多次會議都未完成處理有關申請，泛民議員更輪流用舊調重提方式「拉布」，議而不決，不斷浪費公帑。
人事編制小組尋日開會處理十八項逾期加入申請，一開波泛民議員就提出因為建制派議員嘅申請理由唔同，應分開考慮，又話議員解釋助理出錯或疏忽嘅理由，係老屈助理，覺得要請有關議員出席會議解釋。其實呢個老屈論喺之前嘅會議都講過，只係泛民又循環再用玩「拉布」，有人估計泛民此舉係唔想咁快否決申請，等建制派唔可以直接向財委會「上訴」及通過逾期加入申請。
建制派當然不滿泛民耍花招「拉布」啦，所以要求一併處理申請，可惜大家拗完一輪，Kenneth最終都係決定要分開考慮個別申請。結果開咗一個半小時會議，都只係否決咗保險界議員陳健波嘅申請。照咁睇，都唔知仲要開幾多次會議先得喇。