政情：中環出更：騸雞無心機撐卿姐做主席
白鴿黨將會喺本月底選出新一屆正、副主席等多個職位，提名期將會喺下星期二截止。現任主席劉慧卿尋日被問到會否參選時，佢就未有肯定咁回應，又叫企喺隔籬嘅單仲偕騸提名佢做主席。不過，騸雞就只係回應話：「我都講過唔會參選啦！」後來更掛住手機而無理會卿姐，莫非佢唔想卿姐做主席？
劉仍未決定參選
卿姐話，由於提名期仲有差唔多一星期，佢至今仍然未決定會否參選，又話唔少黨友都覺得佢「太惡」，所以要再問吓黨友意見先至再作決定。卿姐之後行去問騸雞會唔會提名佢做主席，又話如果得到騸雞支持，佢就會更加有決心參選喎。
不過，騸雞全程都唔係好理卿姐，搞到卿姐好無癮咁去食飯。騸雞之後憂心忡忡解釋，由於佢有家人入咗醫院，所以無乜心機。
另外，有意再度參選主席嘅南區區議員區諾軒亦會喺本周內交提名表格，如果卿姐參選，兩人就會打對台。區強調，「年輕化」好重要，希望可以吸引年輕黨員支持。
卓妮