政情：中環出更：觀塘轉型靠立會合作
立法會吹起不合作運動歪風，議員郁親就以「拉布」阻撓政府施政，令到唔少民生議案受到拖累。尋晚日本駐港總領事館喺金鐘一間酒店舉行日皇壽辰酒會，數百名嘉賓去捧場，包括信興集團副主席蒙德揚夫婦、「零食大王」戴德豐及仁濟醫院前主席王忠秣（Ben）等政商名人。
大本營喺觀塘一帶嘅阿Ben話，最近忙緊推動「起動九龍東」工作，其中尤以單軌鐵路為重中之重。
王忠秣盼議員飲水思源
佢話政府將向立法會財務委員會申請撥款一億元，以便展開單軌鐵路嘅可行性研究，希望議員飲水思源，快啲促成有關工程順利展開，事關香港有今日，觀塘幫得唔少喎！
阿Ben話，觀塘已經同深水埗一樣，成為本港人口最老化及貧窮嘅兩大區。想當年，觀塘係香港工業重鎮，對香港今日嘅經濟成就貢獻好大。
蒙德揚日籍妻粵語流利
如今隨着工業北移及大量公屋落成，區內人口老化及貧窮問題浮現，政府及立法會議員好應該幫觀塘打造一個全新面貌。當中交通便利係最重要嘅因素，將來單軌鐵路同沙中線等主要交通樞紐相連接，咁咪可以吸引有錢人搬入去囉！
卓妮當晚亦見到代理開日本電器嘅蒙德揚及日籍太太園田惠美，蒙太嫁咗嚟香港二十幾年，廣東話極流利，唔講真係唔知佢係日本人。蒙太笑稱，好多日本人亦讚佢日本話講得好好添！玩具商開達實業後人丁煒章亦趕到捧場，佢正打算同家人去日本滑雪，希望農曆新年可以抽到時間。
卓妮