每年都搞大閘蟹宴嘅立法會進出口界議員黃定光（象哥），尋日再次請食蟹，座上除咗中華出入口商會會長莊成鑫之外，梗係少不了一直被象哥暗捧為立法會議席接班人嘅中出常務會董周浩鼎（Holden），反而唔見同樣對躋身立法會興致勃勃而且同傳媒關係唔錯嘅中出副會長許華傑（Michael）。
點知飯局進行期間，Michael突然拉隊現身，箇中況味盡在不言中。
其實Michael咁啱喺隔籬有飯局，佢知道象哥請傳媒食蟹，特登入來打個招呼啫！不過，象哥懶理Michael踩場，猛讚律師出身嘅Holden好過佢商界出身，可以投放更多時間喺議會，而且Holden經歷多年《城市論壇》嘅磨練，見慣傳媒，對接棒好有幫助喎。聽落句句有骨，擺明衝着商界出身嘅Michael咁喎！