政情：「四點鐘許Sir」暫別觀眾
佔領行動昨踏入第四十二日，三個佔領區嘅示威者逐漸減少，而「四點鐘許Sir」亦暫別觀眾，皆因警察公共關係科（PPRB）尋日宣布，警方每日同消防處舉行嘅聯合記者會，將會喺有需要嘅時候先同大家見面。憑着友善嘅笑容、獨特嘅英語發音，同每日將講稿「Recap in English」，令PPRB一哥許鎮德係網上爆紅，曾有網民發起「四點鐘許Sir群組」，人數最高峰時多達五萬人，幾乎日日洗版。
記者提問尖銳
對於成為網絡紅人，令大家關注警隊處理佔領行動，許Sir話呢個實非佢所料，亦唔係佢一個人嘅功勞，而係成個警隊在背後支持佢。佢話，每日開記者會，目的係要講解受佔領行動對交通情況同對緊急服務嘅影響，仲要澄清失實同無理嘅指控，加上記者尖銳嘅提問，非常具挑戰性，令佢有時都幾緊張。
許Sir仲話，雖然聯合記者會今後未必日日舉行，但佢仍然會每日返辦公室，朝早開始要睇晒全港報紙，掌握吓唔同佔領區嘅情況，在有需要嘅時候再同大家見面喎。