佔領行動滿月，醫學界人士聯署贈興，批評呢場街頭鬧劇係社會癌細胞，過度生長，不受控制，不斷蠶食香港嘅核心價值。嗱，呢啲咪叫犯眾怒囉，佔領行動搞到天怒人怨，連一向溫和嘅醫學界都忍唔住發炮，呢場港式文革幾咁不得民心，畫公仔唔使畫出腸喇。話時話，香港面對內憂外患，失控嘅唔止係政治癌症o架，世紀疫症伊波拉不斷攻城掠地，萬一本港防疫失守，雙重打擊，雪上加霜，真係想唔玩完都幾難咯。
功夫茶唔係危言聳聽o架，大家不妨聽聽有「伊波拉之父」稱號嘅英國醫學權威Peter Piot點講吖。佢話相當憂慮亞洲嘅情況，事關近年喺非洲工作嘅中國人愈來愈多，一旦隱形病人返國時成為漏網之魚，世紀病毒傳入中國，局面隨時一發不可收拾。佢警告，內地醫院嘅感染控制水平仍未達標，難以及早確診及隔離患者，加上香港機場入境健康申報機制效用低，大大增加被疫症入侵嘅風險，呼籲國際社會提升防疫力度，喺疫區出境登機前加強旅客檢疫，以堵截疫潮於源頭咁話。
你話係咪得人驚吖？中港兩地唇齒相依，內地隨時被伊波拉攻陷，香港亦唔安全得去邊，萬一好嘅唔靈醜嘅靈，疫症一個唔覺意傳入中國咯喎，香港都幾難獨善其身，○三年沙士悲劇重演都有之。正所謂當局者迷，旁觀者清。伊波拉之父嘅警告真係一針見血o架，一來喺中非交往頻繁之下，唔止中國同胞去非洲搵食者愈來愈多，非裔人士嚟中國謀生嘅亦唔少，淨係廣州咋，已經有數十萬非裔人士聚居，隨時成為疫症散播嘅溫床；二來咯喎，港府嘅入境健康申報機制兒戲到冇朋友，居然冇強制要求，即係連旅客有冇如實申報都矇查查，當局把關粗疏成咁，根本同搵市民生命健康較飛冇分別！
即係咁，港府防疫一向漫不經心，大家都見怪不怪咯，不過今次伊波拉比沙士更兇猛，港產官僚依然懶懶閒閒，咁就認真抵鬧喇。呢，本報早前踢爆，機場及離境口岸零設防，職員對非洲旅客視若無睹，唔止冇主動探熱，甚至連防疫宣傳單張都唔派發，咁樣叫做防疫喎，問你怕未！
當然喇，伊波拉危機日甚一日，港府輕敵固然抵鬧，社會輕視同樣得人驚。家陣成個香港陷於政治泥沼不能自拔，鬥生鬥死，沒完沒了，連迫在眉睫嘅經濟民生都冇人理，睇似遠在千里之外嘅疫症更加冇人關心。怕只怕災難往往喺不期然中降臨，到時後悔就太遲嘞！