我哋日前報道過政總及特首辦公室嘅公務員因受佔領行動示威者堵路影響，一度搬竇到中環舊政總，直至周一先全體歸回原位。不過，部分公務員返到政總與其同佔領人士爭位食飯，索性沿夏慤道「步行街」落灣仔食飯，但就唔經唔覺參與「佔鐘」喇。
政府總部飯堂近日有新承辦商進駐，點知新開張不但遇着佔領行動，據聞有政府總部同事試食後覺得新飯堂麻麻哋，無論質素同價錢比唔上之前嘅承辦商，唔少都寧願轉場到立法會飯堂，同立法會員工爭飯食。不過，呢個「飯後感」只係部分人意見，唔代表大多數人嘅意見，可能有人覺得好食都未定。
部分公務員眼見昔日飯堂、毗鄰政府總部嘅中信大廈連日被示威者封鎖出入口，鄰近嘅統一中心、海富中心又長期被示威者「佔領」，因此索性經夏慤道佔領區，步行至灣仔春園街一帶開餐，估唔到「佔領」幫公務員慳咗程港鐵車費。