中環出更：傳佔中「芬」歧 家嘈屋閉
一場佔領行動，令香港社會嚴重撕裂，唔少家庭都因為咁搞到家嘈屋閉，有傳聞話梁美芬同妹妹都因為就佔中持相反意見，結果日日喺屋企嗌交。尋日卓妮問梁美芬係咪真有其事，佢就尷尷尬尬話唔講屋企事，但承認家族成員對佔中有唔同意見，因為家中有人做警察，亦有人做社工，大家睇法自然好唔同。警察同社工？梁美芬家中咪日日上演六國大封相囉？
其實係做「和事老」
梁美芬仲話，唔止職業，就算屋企人係同一種宗教信仰，都因為佔中而拗到面紅耳熱，所以佢喺屋企就唔多講嘢，負責做「和事老」調停家中糾紛，叫大家冷靜啲，唔好咁激動。其實除咗屋企，梁美芬在過去兩、三星期都有落去金鐘、旺角同班學生傾偈，上星期仲同班留守學生傾咗個幾鐘，發覺絕大部份留守人士都係和平理性，認為政府應該多啲同學生溝通，總好過無對話喎。
卓妮