繼去年八月有行政會議成員及立法會議員接受航空公司款待豪遊法國後，早前多名泛民主派議員又被指收取壹傳媒老闆肥佬黎政治捐款而冇申報，搞到依家個個議員變成驚弓之鳥，莫講話大筆捐款或豪華外遊款待，直頭係事無大小都一於申報咗先。我哋近日翻查議員嘅個人利益登記冊時，就發現有幾個民主黨（白鴿黨）議員齊齊申報早前外訪期間收到嘅朱古力。
事緣上月立法會代表團外訪北歐八日，於九月二十日去過參觀丹麥哥本哈根一間朱古力製造商嘅專門店，了解有關當地食品加工業嘅最新發展，其中白鴿黨劉慧卿、黃碧雲及涂謹申三人返回香港後就各自申報，當日獲該公司贈價值不高於港幣五百元嘅朱古力。
其實涂謹申同黨友何俊仁去年已經因為豪遊法國事件搞到一身蟻，點知近月涂謹申又捲入政治捐款醜聞，雖然佢否認有收過肥佬黎錢，但就似乎搞到成個黨對申報利益問題好緊張，難怪連一盒朱古力咁濕碎都急急照申報。