政情：立會建制派 盡搶委會職

「班長」收錯風遭突襲

工務小組同人事編制兩個小組委員會負責掌管政府財政控制權，建制派本來就不容有失，但今次竟然被泛民突襲成功，搞到唔少建制派議員心中有氣，質疑身為建制派「班長」嘅民建聯葉國謙收錯風，誤以為泛民只係想搶事務委員會主席職位，點知原來泛民係想搶走建制派喺財政議題上嘅生殺大權，變相廢建制派一半武功。

本來每年新會期開始前夕，泛民都會同建制派開會協調來年各事務委員會嘅正副主席安排，但今年出現政改爭議，泛民單方面暫停協調，仲不斷派人加入各小組委員會搶位。既然泛民無心協調，建制派亦唔會一廂情願咁被泛民「住搶」，決定推翻原來嘅協調結果，全數搶盡十八個事務委員會嘅正副主席職位，等泛民一席都攞唔到。

財會副主席交陳健波

由於泛民今次玩到咁寸，有建制派中人建議搶埋內務委員會及財務委員會兩個副主席職位，當中財委會副主席屬意由保險界陳健波出任，為佢鋪路喺最後一年接替金融界吳亮星做財委會主席，而內會副主席之位仍在物色人選。建制派今朝會再開會商量點樣對付泛民，避免泛民嘅不合作運動得逞。

另外，立法會主席曾鈺成尋日透露，已收到議員投訴不滿在佔領行動期間，有泛民議員縱容示威者在立法會大樓瞓覺，佢重申議員有權帶訪客進入大樓，但就會因應議員投訴，勸喻相關議員要遵守使用立法會場地嘅守則。