政情：吳秋北選港島要等2020
早前有傳工聯會理事長、有「工記吳啟華」之稱嘅吳秋北可能會在下屆立法會選舉空降港島區參選，搞到原本打算轉戰該區直選嘅現任勞工界議員郭偉強一度無所適從，望天打卦。不過，傳聞歸傳聞，原來根據工記不成文規定，理事長身為工會「管家」，三年任期一做就要做三屆，○九年上任嘅吳秋北按規矩至少坐多四年先回復自由身，睇怕佢參選呢個美麗傳說要到二○二○年先有機會成真喇！
嫻姐隨時再選
據了解，工記坐擁近四十萬會員，為確保呢個全港最大工會持續穩定，過去一直有不成文規定，會長同理事長任期都長達九年，如果吳秋北未搵到接班人就貿然由幕後走到幕前，工記失去支撐，隨時「有前冇後」，況且吳秋北只係四十歲出頭，又未經歷過直選洗禮，不熟悉選舉工程成為佢參選一大障礙，「浸」多幾年再戰立法會或者勝算更高。加上佢近期搞政改嘅反應好壞參半，都係睇定啲好。
至於循超級區議會當選嘅陳婉嫻，據工記耳語透露，兩年後嫻姐已經七十歲，無意再下一城，眾望所歸由王國興接棒，港島區議席空缺自然由郭偉強補上。我哋問過嫻姐係咪有意裸退，但佢顯然唔想多講，只係顧左右而言他。有工記中人指嫻姐反應不足為奇，自嘲工記係就係人多，但負責吸票嘅政治明星就寥寥可數，假如王國興無能力奪得一個超級議席，嫻姐唔排除要着番「超人衫」再選。
郭偉強變熱門
按推論，既有直選經驗又有望取代王國興選港島議席嘅，就淨番盤據東區多年嘅郭偉強。雖然郭偉強知名度點都唔及王國興，但據聞郭近年密食當三番，頻頻搵議題代表工會發言爭取曝光，黨內元老亦唔介意畀佢多啲見報。郭偉強參選港島相信已經進入大直路，一六年食粥食飯就要睇佢自己造化喇！