人稱「公民廣場」嘅添馬艦政府總部東翼前地早前閉關加設永久性鐵欄，終於喺上周重開，不過政府疑似諗縮數，規定每逢周日同公眾假期嘅指定時間先畀團體申請集會，以為抗議示威次數就會減少，但有人最近發現呢個諗法係「捉蟲」，聽聞佔中及反佔中陣營，都希望搶到周日黃金時間舉行集會，仲要今個星期申請失敗，就會順延申請下個星期，直至申請到為止，睇怕未來兩、三個月想有平靜嘅周日都難嘞。
專上學生聯會早前宣布本月廿二日舉行罷課，其後申請一連十日喺公民廣場集會，但行政署以申請時間超越開放時間為由拒絕。相比之下佔中就有策略性部署，打算跟足規矩逢周日都申請集會，直到佔中正式爆發為止。
不過同一時間，據聞好多愛字頭團體有意申請喺公民廣場集會，加上保衛香港運動傅振中、九龍社團聯會等都打算喺即將來臨嘅周日集會，擺明係想搶佔中頭啖湯。
話時話，政府限定集會時間，分分鐘導致每周日都上演政治大龍鳳，唔知呢啲係咪叫自己搵石頭砸自己隻腳呢？