尋日我哋啱啱寫完，立法會議會聯絡小組舉辦嘅北歐三國八日考察團，有多名泛民團友都選擇提早起程或者延遲返港，擺明想賺盡由公帑支付嘅長途機票自娛。考察團尋日正式啟程，立法會秘書處罕有透過新聞處發稿，如數家珍咁詳列今次訪問嘅行程活動，以及預計會會見嘅機構同政要名單，希望幫班貪威識食嘅議員團友「消消毒」。
根據秘書處嘅新聞稿，考察團將於當地時間昨晚飛抵首站芬蘭，周一至周二有多達九項行程，主要係會見當地政府官員、國會議員同港商代表。考察團周三至周四轉往挪威後，同樣有九項活動，包括會見當地官員、議員同大學學者。周五至周六去到尾站丹麥，亦有七項行程，主要係同當地國會交流，臨尾仲會參觀一間知名嘅朱古力專門店，然後大部分團友會喺周六晚啟程返港，睇落相當緊湊同繁忙。
不過，新聞稿就冇列出個別議員早到或遲走嘅私人行程內容，否則肯定會仲精彩。