政情：中環出更：升呢周永健開鑼拉頭馬

新馬季尋日正式開鑼，沙田馬場逼到爆，除吸引到一班馬迷到場感受氣氛外，梗係唔少得一班馬主同馬會董事局成員啦！卓妮見到剛接棒成為新任馬會主席嘅葉鍚安（Simon）同新任大董梁高美懿（Margaret）一早到場，仲雙雙攜眷出席添。而剛由大董升任副主席嘅周永健，更一上任即拉頭馬，佢話上次拉頭馬已經耐到唔記得咗係幾時，所以非常開心。
周永健（左）帶埋太太胡慕芳入場，一開季就拉頭馬。
周永健（左）帶埋太太胡慕芳入場，一開季就拉頭馬。

今年係馬會一百三十周年，啱啱返港不久嘅葉鍚安透露，已準備好迎接繁重工作，事關佢之前趁馬季抖暑期間，去咗唔同地方四圍行。而嚟緊馬會將有一連串嘅慶祝活動，佢預咗喺下個月先同大家公布，所以暫時要賣個關子。身兼創興銀行副主席兼董事總經理嘅Margaret，未做大董前已經常喺馬場出沒，對於今次進身馬會董事局，佢自爆喺二千年成為馬會會員，但如果同老公梁承達相比，就仲差好遠喇，因為梁生早喺一九七八年就係馬會一分子。

圖為廖長江夫婦（左一及二）與陳南祿夫婦。
  • 圖為廖長江夫婦（左一及二）與陳南祿夫婦。
梁高美懿爆老公梁承達早佢逾廿年做馬會會員。
  • 梁高美懿爆老公梁承達早佢逾廿年做馬會會員。
葉錫安（左）與太太出席馬季開鑼日。（葉華英攝）
  • 葉錫安（左）與太太出席馬季開鑼日。（葉華英攝）

將添博士銜 陳南祿笑晒

同場仲有另外兩位馬會大董陳南祿（Philip）同廖長江。見Philip笑容滿面，原來佢下月將獲嶺南大學頒發社會科學榮譽博士學位。Philip除咗喺香港大學考取學位，港大同科大亦先後頒過名譽大學院士同工商管理學榮譽博士榮銜畀佢。但佢好謙虛咁話，太太伍淑恩仲叻過自己添！

卓妮

第一手消息請下載on.cc東網iPhone/iPad/Android/Windows Phone Apps