政情：阿蘇落區「o趙完鬆」
早前我哋講過，工聯會立法會議員陳婉嫻最近想在九龍城打造「潮州一條街」旅遊景點，一心邀請商務及經濟發展局局長蘇錦樑（Greg蘇）落區視察，可惜Greg蘇遲遲冇反應，激到嫻姐紮紮跳。直到尋日，Greg蘇先終於肯應邀到九龍城參觀多間潮州商舖，行到邊食到邊，試食完魚蛋又試糕點。不過，佢對商戶捱貴租似乎冇乜實質建議，一味叫商戶自我增值及開源，睇嚟今次視察都係做騷兼煲無米粥居多。
話說嫻姐見九龍城區放寬咗樓宇高度限制，加上該區潮州人及潮州店舖眾多，於是建議將九龍城街市加高一兩層，等啲捱緊地舖貴租嘅舊式潮州店舖搬上樓集中經營，概念類似一條潮州街。嫻姐仲話，現時每次有傳統小商戶及食肆結業，大家都好似趕住去食咁，佢唔想見到一間又一間老舖結業，所以希望呢個方法可以提高街頭經濟嘅生存空間。講到底，呢啲都係嫻姐以前推動過嘅本土經濟。
淨識叫人開源增值
該區現時有不少滷水小食及紙紮等潮式店舖，有店販表示一個七百呎舖位，月租約六萬元，但生意額卻與剛開業時相差甚遠，由一日賣出三十隻燒鵝，到現在一日只賣出八至十隻。有商戶反映租金高企，希望政府可以每年資助佢哋兩至三個月租金，部分商戶更話唔抗拒搬上街市經營，認為只要租金便宜，約二百呎舖位已經夠用。
不過，Greg蘇冇正面回應有關建議，只係話香港土地資源珍貴，租金壓力其他區都有，建議商戶開源及增值喎。佢又舉例附近一間潮式糕餅店，將傳統食品用創意重新包裝並註冊專利後，成功開闢到新嘅客源，叫大家動動腦筋，幫商戶從高增值及市場方面發展。
咁講法，咪即係叫啲商戶自求多福？Greg蘇就話，政府會同旅遊發展局研究於網頁及手機應用程式加強推廣有關特色店舖，於十八區舉辦深度旅遊吸引遊客喎！唔知嫻姐有冇後悔請Greg蘇落區呢？