中環出更：肥佬黎再密會「歐元之父」 又攪局？
壹傳媒老闆肥佬黎再被撞破同「歐元之父」蒙代爾（Robert Mundell）密會！肥佬黎繼上月被我哋發現密會蒙代爾，仲介紹對方睇佢幫襯開嘅腦科治療中心後，事隔約一個月，尋晚又發現蒙代爾拉大隊到肥佬黎嘅何文田寓所食晚飯，莫非係密斟攪局？
「白頂黑獄」有飯局
昨晚近七時，肥佬黎嘅「白頂黑獄」寓所大閘突然中門大開，原來一架七人車正駛近大閘，車入面正載住蒙代爾同一男兩女，隨即再有一名女子偕外籍男士搭的士抵達，一同步入肥佬黎大宅。上月一臉倦容、仍以輪椅代步嘅蒙代爾，尋晚驟眼望落去依然明顯不良於行兼木無表情，但由於肥佬黎急急閂埋寓所大閘，所以蒙代爾落車後仲需唔需要以輪椅代步就不得而知喇。
直至九時約十分，蒙代爾一行人先施施然行出大閘，肥佬黎亦企到出門口送客道別，期間仲雞啄唔斷，似乎難捨難離咁喎。蒙代爾上車後，其餘一男一女同外籍男士亦同蒙代爾各自離開，唔知今次佢哋又有咩密偈要傾呢？
卓妮