中環出更：商界名人：遍地黃金成絕唱
香港作為國際金融中心，搵錢唔難，但想致富賺得人生第一桶金，考起唔少年輕人。協成行董事總經理方文雄（David）直言，香江最易搵錢嘅大時代已過去，如今投資股市或樓市波動極大，年輕人手中無「水晶球」，切忌短炒。
匯聚企業管理精英嘅特許金融策略師協會早前舉行首屆理事就職禮，同時頒發多個傑出商業獎項。獲頒企業社會責任獎嘅David幾忙都來領獎。講起累積財富，佢話遍地黃金嘅年代已成絕唱，如今搵錢的確艱難，想喺危機四伏嘅投資市場上賺到錢，更加要做足功課，寧願放中長線策略投資喺優質公司，好過炒上炒落心驚膽跳。David縱橫股壇多年，果然係薑愈老愈辣。
李君豪寄語後輩要有誠信
港交所獨立非執行董事李君豪都有同感，佢慨嘆時下部分年輕人崇尚拜金主義，太急功近利，寄語後生仔堅持誠信、大公無私，香港先繼續有前途喎！同場嘅新華旅遊董事總經理楊章桂芝都係投資高手，早喺七十年代已買入物業，賺得人生第一桶金。多年來佢不斷買賣寫字樓及商舖，身家三級跳。佢話：「我經常勸員工，就算無錢買磚頭，都要買車位。單靠加人工致富，試問加得幾多？」近日佢吼實日本東京嘅物業，貪當地樓價平，收租回報好吸引。
特許金融策略師協會理事會主席周浩雲就喜歡投資喺「沙紙」上，話要持續進修增值。
佢話金融業係場殘酷嘅淘汰賽，天天有人出局，勉勵金融尖子們多吸收知識，先可以保持頭腦清醒，洞察先機。
卓妮