政情：白鴿怕超選 新西爭崩頭
我哋早幾日寫過，民主黨（白鴿黨）內部就一六年立法會選舉爆發爭位戰，其中港島區有多達四人爭奪一個議席。原來該黨現時一席都冇嘅新界西選區，亦有多達三名區議員報名參選，包括來自屯門嘅「老鴿」陳樹英（阿Tree）、來自荃灣嘅「中鴿」尹兆堅、以及來自元朗嘅「乳鴿」鄺俊宇。有人建議既然三個都身兼區議員，不如其中一人轉戰「超級區議會」疏散吓。但由於選超級變數較多，勝算不穩，三人暫時都唔肯轉區，令該黨相當頭痕，擔心內部遲早會惡戰連場。
上屆衰貪心 首缺席新西
白鴿黨上屆喺新西部署失當，太貪心同時派出李永達（高達）同阿Tree呢對夫妻檔上陣。其後見形勢不妙，兩人又拒絕「棄保」，最終雙雙落選，令白鴿黨歷來首次缺席新西。
下屆選舉好快又殺到，高達早已表明唔再參選，全力支持多次同立法會擦身而過嘅太太「屢敗屢戰」。阿Tree本身亦相當勤力，遊行示威幾乎次次都有佢份。至於由街工出身嘅中生代尹兆堅，雖然曾自爆有過婚外情，但仍深得黨內大佬歡心，佢嘅地區工作亦做得唔錯。但問題係兩人形象好聽啲就係實幹，唔好聽就係欠缺魅力同年輕人票源，兩人同區一齊參選，隨時會重蹈上屆選舉嘅覆轍。
屬於後起之秀嘅鄺俊宇，講激講勤力都唔夠黨內兩位前輩，但係佢喺網絡發表嘅愛情小說，就成功吸引到一班後生仔女支持，最近仲一年內連出兩本書，銷量尚算唔錯。所以黨內就有人建議由鄺俊宇，取代阿Tree或尹兆堅其中一人參選，認為可幫到個黨開拓新票源，抗衡以年輕支持者為主嘅激進泛民對手。
超選變數大 新人唔敢博
白鴿黨內亦有人指出，既然鄺俊宇嘅支持者來自全港各區，理應接替將會退休嘅何俊仁，轉戰全港性嘅超級區會。不過眾所周知，角逐超級議席有好多變數，包括自己能否喺明年區議會選舉連任，以及同屬泛民陣營嘅公民黨會唔會同派乜人參選。如果公民黨派出有分量嘅人參選超級，白鴿黨就好難保住現有兩個超級議席，即新參選人同現任嘅涂謹申肯定冇得同時留低，因此該黨好多新人都寧願留喺地區直選爭崩頭，都唔敢冒險「升呢」轉戰超級。