政情：九巴「睡美人」成偷竊目標
九巴上月推出兩條晨早特別線，仲專程請咗個靚女模特兒拍宣傳海報。海報上的靚女模特兒着短裙，一身OL裝扮，在巴士座位上睇睇吓書瞓着覺，比喻呢兩條新線快捷舒適啱晒補眠，係「睡美人」模特兒嘅「夢寐旅程」，點知張海報一貼出巴士站頭就被人偷。
海報一貼出瞬即消失
九巴話見宣傳效果咁好，會考慮叫模特兒親身落區宣傳喎。
九巴企業事務總監陳碧君尋日同傳媒茶敍，宣傳新線之餘向傳媒大送新海報，期間自爆呢批「睡美人」海報好歡迎，印咗幾千張，一貼出上水、粉嶺同尖沙咀嘅巴士站頭就畀人偷咗唔少，朝早貼咗，夜晚就唔見晒，但係佢無透露究竟唔見咗幾多張海報。
陳碧君透露，個靚女模特兒叫Christy，係今次九巴特地請返嚟宣傳新線，拍咗唔少款相，最終覺得「睡美人」版本最可以表達兩條新線有幾舒服，又話「睡美人」模特兒遲啲都會參與其他宣傳活動。