政情：九東大換血 直選勢混戰
二○一六年立法會產生辦法預料唔會有大變動，但九龍東選情就風起雲湧喇，事關有傳三位現任九龍東直選議員，包括民建聯陳鑑林（橄欖）、公民黨（公文袋）梁家傑（袋巾傑）同獨立謝偉俊（Paul）可能會退下來，畀新人上位，或轉戰超級區議員。有講法話，九龍東現時未有走激進路線嘅議員，如果議員黃毓民由九龍西選區轉戰九龍東嘅說法真確，分分鐘可以搶灘成功。
阿Paul可能轉戰超選
現年六十五歲嘅橄欖已經做咗立法會議員十幾年，有傳佢下屆會退下火線，畀新人上位。據聞該黨已嚴格篩選緊合適嘅接班人，最有機會跑出嘅係已歷任四屆觀塘區議員嘅柯創盛，以及身兼香港中小型律師行協會會長嘅黃大仙區議員陳曼琪。兩人一個地區經驗豐富，一個係專業人士，邊個可以上位暫時都係未知之數，但相信與曾任九龍東票王嘅橄欖相比，就算保得住個位，票數一定會流失。
至於在今屆立法會成功由功能界別轉戰直選嘅阿Paul就傳會再轉戰場，挑戰超級區議會議席。本身並非區議員嘅阿Paul最有可能會明年參選區議會，接替本身係灣仔區議員嘅「白姐姐」白韻琹，為參選超級區議會做好準備。如果阿Paul真有此意，屆時九龍東就會空出一席，相信各陣營都會虎視眈眈。
「袋巾」為譚文豪「抬轎」
現時民主黨在九龍東行基層路線，公文袋就主打中產區，但就未有走激進路線嘅人。聞說毓民會同愛將、一二年參選九龍東嘅黃洋達互調選區，以毓民嘅知名度要「空降」九龍東贏取議席並唔出奇，但如果屆時又殺出個社民連陶君行，泛民就會陷入四方混戰局面，建制派分分鐘可以坐享漁人之利。毓民就回應話，佢空降九龍東嘅講法係無中生有。
除咗建制派要搵人接班外，泛民公文袋亦都要換血。盛傳連續做咗三屆議員嘅袋巾傑將會放棄連任，全力支持黨內飛機師譚文豪（Jeremy）。Jeremy在一二年立法會選舉已經拍住袋巾傑出選九龍東，但當時排第二未能晉身立法會，下屆選舉兩人可能調番轉，由袋巾傑幫佢抬轎都唔定。