中環出更：朱玲玲向女士教路「美麗係由心而發」
「盛女」、「沒女」等話題近期鬧得熱烘烘，「永遠最美麗港姐」朱玲玲（Loletta）就替佢哋大平反，話各地女性文化背景唔同，各有所長，所以呢啲稱呼只係社會部分人對香港女性嘅誤解。Loletta又非常關心時下女性嘅未來，提到香港女士擇偶困難時，佢就話留意到香港適婚人口女多男少，女士揀老公都應該有合理期望嘅。
香港青年聯會（青聯）日前舉辦分享講座，為咗力撐身為青聯主席嘅兒子霍啟剛，Loletta親自出任嘉賓分享個人經歷及美麗心得，吸引近百位青年才俊、尤其是年輕女會員報名出席。Loletta話，「沒女」想大翻身，自我增值好重要，又話美麗係由心而發，要時刻保持正面思想，懂得欣賞同享受生命，就自然會靚嘞。
「最緊要充實自己」
Loletta又提到要好好享受生活中每個角色，指自己時而擔當母親角色，時而係善團領袖，但無論擔當咩角色，都係學習好機會喎。佢仲透露，同三個囝囝平日相處融洽，無所不談，秘訣係靈活變通，因應對方唔同性格施以不同教法，又教導兒子從小學會獨立，唔可以恃寵生嬌。
青聯常務副秘書長羅詠詩（Anthea）亦有捧場，佢話都有留意「沒女」節目，認為女性應該要對自己有多啲信心，唔需要太在意人哋嘅睇法，最緊要係充實自己，不時主動學習自我增值。Anthea仲畀咗少少貼士一啲已經有內在美但唔夠自信嘅女士，話只要配合少許化妝，加上有充足睡眠，儀容就可以更加大方得體。
卓妮