泛民主派同建制派對政改嘅意見南轅北轍，最終會唔會傾唔埋一拍兩散都係未知數。立法會議員劉慧卿尋日就喺電台節目中話，佢哋唔會接受假普選方案，如果八月人大常委會決定接受民建聯同工聯會嘅高門檻方案，民建聯同工聯會就將會成為「歷史罪人」。工聯會榮譽會長鄭耀棠亦不甘示弱，反駁話歷史自有定論，仲拋番個波畀泛民，話政改方案係咪通過最終都要靠泛民嘅票支持，如果泛民唔支持，令政改無法通過，咁泛民就要負上責任喎。依家你一言、我一語，唔知最後邊個先係「歷史罪人」呢？
