近兩年立法會「拉布」可謂家常便飯，而「拉布」議員為求會議拖得就拖，不時要求主席響鐘點算開會法定人數，令會議需要暫時停止，等夠法定人數先至可以恢復會議。不過，對於秘書處來講，當有議員要求點算開會法定人數，佢哋就要即時停止手頭上嘅工作，逐一點算身處會議廳內嘅議員人數，等一夠數就即時通知主席復會。
秘書處平時都係用印有議員座位表嘅紙張數人，如果議員身處會議廳，秘書處職員就會喺座位表上有關議員名字隔籬剔一剔，代表該位議員有出席會議。不過，如果有議員喺響鐘期間無啦啦又行咗出去，職員又要劃走有關議員個剔，話咁易搞到個表花晒，唔留神分分鐘睇漏眼或數錯。
有見及此，秘書處最近就研發咗一個「數人App」，以後秘書處職員一拎起部平板電腦，就可以用「篤手機」嘅方式「篤人頭」，比以前喺張紙上面畫來畫去方便及準確得多。個App除咗可以記錄議員開會情況，更可以電子化咁記低「拉布」議員要求點人嘅時間同次數，咁秘書處以後就唔使怕計錯數或數錯人數喇。