政情：議員最怕起壞朵
開講有話政治嘅嘢一日都嫌長，要喺政壇立足甚至做到街知巷聞，除非天生一副明星相，否則單憑實力真係唔容易。一眾立法會議員之中，唔少人都絞盡腦汁希望憑「成名作」彈出，最出名肯定要數蔣麗芸（Ann）甫出道憑「獅吼功」名震政壇，隨即被冠以「政壇元秋」稱號。而另一「瘋雲」人物、經常同阿Ann針鋒相對嘅黃碧雲，亦有「一舊雲」稱號，據聞佢對呢個花名唔係好受落，無奈點洗都唔甩。
黨友提議「黃老太」 碧雲嫌棄
據知阿Ann起初都唔多鍾意「政壇元秋」呢個外號，但當市民受落時，都唔輪到佢唔接受，甚至愛上呢個稱號。不過，唔係個個都咁好彩可以求仁得仁喇，講緊嘅就係有「一舊雲」之稱嘅黃碧雲。一舊雲明明有英文名叫Helena，但前年上任冇耐就因為錯掣投錯票，而變相放生涉嫌偷步賣樓嘅時任行政會議成員林奮強，𤓓爆之餘更被冠名「一舊雲」，至今都未搣得甩個花名。
聽聞一舊雲對花名唔多受落，所屬政黨內部都有討論過係咪應該為一舊雲改番個新朵「以正視聽」。有人提議過，既然一舊雲身兼立法會食物安全及環境衞生事務委員會主席，成日評論政府驗菜、驗肉咁，不如學經典超市廣告人物叫「黃老太」啦！可惜一舊雲嫌個名老，唔肯叫自己做「老太」而擱置，黨內搲爆頭都拆唔掂點樣幫佢改花名。
「胡志偉」普通 冇被改花名
其實一舊雲唔算可憐，好似佢黨友何俊仁，多年來都因為年前遇襲被扑頭大難不死而被戲稱「鐵頭仁」，直至佢年初被我哋撞破佢開會公然喪睇𡃁模艷照，於是就多咗個名做「AV仁」，呢啲花名真係唔改好過改嘞。此外，議員梁美芬都係因為當年喺旺角街頭滅鼠而被冠名「鼠王芬」，一直叫到依家。
不過，唔係個個議員都「有幸」被人改花名，好似胡志偉就因為個人同個名都太普通，加上冇乜「成名作」，一直只係叫志偉，對提升知名度唔多唔少都有阻滯。但志偉相當豁達，笑言多年來慣咗大家咁叫佢，有冇花名都冇所謂喎。