街市雜物霸道 食環署懶理
「啲發泡膠箱疊到高過我個女，入面又唔知裝咩，冧落嚟真係好危險！」楊小姐近日途經牛池灣街市時，發現港鐵彩虹站出口旁放有大堆雜物，擔心影響途人安全，不滿食物環境衞生署未有正視雜物阻街問題。
職員指覆查無發現
食環署發言人證實，過去一年共接獲一宗相關投訴，接獲轉介後已即時派員巡查，發現有發泡膠箱及塑膠容器違例擺放於行人路上，期間已勒令有關物主將物品移走並發出口頭警告，職員覆查時並無發現有雜物阻街。
「係都要同《東方》投訴食環署先肯郁一郁，啲職員做嘢可唔可以主動啲？」楊小姐不滿食環署處理效率不佳，建議當局應加強留意上址情況。