政情：滕彪赴哈佛 擔任訪問學者
唔少出席咗今年六四燭光集會嘅市民，都會認同當晚最令人慷慨激昂嘅發言，並非來自本港嘅泛民人士或流亡海外嘅學運領袖，而喺來自內地嘅維權律師滕彪。滕彪年前嚟咗香港，喺中文大學法律學院擔任訪問學者，兩年合約及相關工作簽證即將屆滿，本月底佢就要離開香港。佢尋日透露，已獲美國哈佛大學邀請佢擔任訪問學者，又自言留港期間不斷寫文同發言批評內地政府，今後或要長期流亡海外。
滕彪接受傳媒訪問時表示，過去一年內地當局對維權律師嘅打壓愈嚟愈嚴厲，但呢種高壓手段，並冇令願意擔任維權律師嘅內地人減少，由○三年全國估計只有幾十名維權律師，到依家已經增至上千人，相信未來會有更多人加入維權行列。
合約僅一年
滕彪今次轉戰美國哈佛，合約只有一年，但係佢就坦言暫時都未有歸期，甚至可能要過流亡生活。佢又話就算身在美國，都會繼續留意內地嘅人權狀況，以及香港政改嘅最新發展。