政情：再戰財會？卿姐諗諗先…
民主黨主席劉慧卿（卿姐）前後做過超過廿年立法會議員，亦當選過多年嘅財務委員會主席，乜嘢風浪都見過，即使近年多次角逐財委會主席失敗，佢都屢敗屢戰，從冇退縮。不過佢尋日同傳媒茶敍時，就透露來年未必會競逐財委會主席一職，莫非佢見到現屆主席吳亮星（星爺）做到一鑊泡，唔想接手呢壇賣剩蔗？有建制派人士就直言，依家無論由邊個出掌財委會，都一定會畀激進泛民玩殘，提議不如讓畀卿姐做好過。估計卿姐係收到風，先至唔肯踩落呢個陷阱。
似乎識穿奸計
根據建制派嘅內部協議，財委會十月復會後，將改由飲食界張宇人出任主席，到最後一年再輪番到星爺，卿姐最多只能出任副主席。但由於星爺過去一年嘅表現實在令人慘不忍睹，連政府都好有微言，唔少建制派私下都表明唔會再畀星爺做。其中有人提議由近年表現硬淨嘅保險界陳健波接手，亦有人認為陳健波始終都未做過主要委員會嘅主席，加上一眾激進泛民，肯定會喺最後一年「玩鋪勁」瘋狂拉布，建議不如改由卿姐接手呢個燙手山芋。若然最後出咗事令某啲重要民生撥款過唔到，市民要怪就怪責泛民同卿姐，建制派唔使孭鑊！
卿姐尋日被問及會否再戰財委會主席時，就好罕有咁話要要再考慮吓先。佢一方面數番自己當年做財委會主席時，連開數十個鐘頭會議，終令高鐵撥款如期通過嘅「戰績」。但佢另一方面又透露，有泛民議員同黨友私下勸佢唔好參選，一來係勝算低，二來就算成功當選，都會做得好辛苦，似乎係識穿咗建制派嘅奸計。
始終心大心細
問佢係咪怕咗激進泛民發動嘅拉布戰，卿姐並冇直接回應，但係就承認財委會工作近年變得愈嚟愈複雜，做主席一定要有迎難而上嘅精神喎。唔知佢係想講畀張宇人等建制派同事聽，定係自己仲係心大心細，仍然想迎接呢個挑戰呢？
民主黨多名溫和派成員，包括李華明、羅致光、狄志遠同吳永輝等，早前都有聯署呼籲各界放下對立、就政改談判溝通嘅聲明，喺黨內黨外都引起一定爭議。卿姐強調該黨一直冇放棄談判溝通，例如今日下午就約咗港區人大代表黃友嘉見面，希望透過對方向中央傳遞民主黨對普選嘅訴求，但由於黨內對今次聯署有唔同意見，吳永輝作為該黨嘅中常委兼司庫，簽名前應先得到黨內同意，至於李華明等普通黨員，則有權利同自由參與聯署。