中環出更：環境局三人組唔識同建制打交道
環境局局長黃錦星（星星）、副局長陸恭蕙（Christine）同政治助理區詠芷（Michelle）三人都環保專家，各有所長，前年年底埋班時被喻為環保界嘅「夢幻組合」，不過經過年多實踐，政界開始發現呢個環境局三人組存在一大盲點，就係原來冇人識同建制派打交道及拉票。
立法會財務委員會同環境事務委員會，早前先後終止待續及否決活化已復修堆填區計劃同小蠔灣廚餘回收中心撥款，兩次「死因」都係建制派無出力護航，而負責推銷呢兩項政策嘅，都係同泛民關係較好嘅Christine，當中嘅政治訊息不言而喻。至於做環保團體出身嘅Michelle，亦被指只顧同環團聯絡，好少同議員或政黨傾偈，作為專責溝通工作嘅政治助理，表現同樣係有欠全面。
星星被訓斥「唔識做官」
至於環境局一哥星星，聽聞曾有資深建制派大佬，喺飯局上當面直斥佢「唔識做官」，例如從無主動去信相關立法會委員會或區議會要求出席解畫，搞到要由議員出手傳召佢嚟開會，結果自然鬧多讚少。呢位大佬最後教埋佢寫信嘅格式同用語，認真瘀皮。據聞建制派最不滿環境局當佢哋「有事鍾無艷，無事夏迎春」，希望三人組得亡羊補牢，喺立法會十月復會後加緊同建制派修補關係，否則「三堆一爐」撥款隨時凍過水！
卓妮