中環出更：資料外洩成瘋 IT達人好淡定
繼壹傳媒老闆肥佬黎嘅秘密檔案曝光，揭發佢捐大筆政治獻金畀多名泛民主派議員後，藝人馬賽嘅性感照片又外洩，網絡平台嘅保安，真係搞到人心惶惶。不過，卓妮日前見到一班資訊科技界（IT）朋友，佢哋就話科技發達，網絡保安未必做到咁多，所以資料會否外洩，亦唔擔心得太多，最緊要係做人要行得正企得正，咁就算個人資料外洩都唔使驚喎！
洪為民：老爺機最安全
雖然話唔驚啫，但防範措施始終都要做好嘅，好似互聯網專業協會會長洪為民，除咗有部智能電話外，長期袋多部只有打電話功能嘅「老爺」機，佢話古老嘅手機先係最安全，依家隨身帶住嗰部機已成絕版貨，倘若搵到同款手機，一定會大量入貨喎。至於香港資訊科技聯會（ITJC）副會長陳永誠就話，手機一定要跟身，唔可以留畀任何人代管，佢笑言就算係太太都冇情講喎。
李煥明：冇咩唔見得人
Autodesk香港及澳門地區區域總監李煥明（Wendy）話，佢部電話入面冇咩唔見得人嘅相片，最重要都係朋友嘅電話號碼，所以如果唔見咗部手機都會擔心，但家人嘅電話號碼就一定記得。中大工程學院副院長黃錦輝就話，一般市民用嘅手機，安裝咗遙控程式，就算被偷電話，都可透過程式刪除手機內所有內容，而商業公司用嘅手機就要安裝加密器，就萬無一失！
講到呢度，卓妮同班IT朋友又點可以唔講吓創新及科技局呢？新就職ITJC會長嘅邱達根就話，業界真係好期待呢個政策局快啲成立，而佢就認為係遲早嘅事。立法會資訊科技界前議員譚偉豪（Samson）就話，其實創科局一定要喺今年底前成立，否則局長上任一年就換屆，咁就搞嚟都冇意思啦，所以希望政府着緊啲喎。
卓妮