香港啲議員，之所以「尊貴」，皆因佢哋可以在議事堂口沫橫飛，甚至拍枱拍櫈指啲高官濫用公帑，又炮轟盛事基金未有要求受資助團體提供開支單據……
然而，最近「尊貴」嘅一班議員，畀傳媒踢爆原來立法會亦沒有強制議員報銷酬酢及交通開支時提供單據；換言之，公務員申請酬酢津貼時必須提供實際開銷單據，而「尊貴」嘅議員因「怕煩」而不須接納十年前廉署嘅建議，即係「提供單據」；香港議員之所以「尊貴」，皆因佢哋使公帑都有「優先」權！再講，泛民政客連啲「捐款」都可以「袋住先」，認真「尊貴」到冇朋友！
平情而論，議員都係人，都有「脆弱」嘅一面，要佢哋「自律」，要佢哋「應使則使」顧住納稅人個荷包，要佢哋唔好學內地因「應酬文化」而滋生腐敗，其實都係強人之難！何況「尊貴」嘅議員，有時分身乏術──唔係因為去飯局「花些不明不白的錢，找些不三不四的人，說些不痛不癢的話」而未能出席議會，就是「太多會開」搞到流會，所以唔得閒開單，或「怕煩」搞到「正經事」，部分議員「亂咁篤數」及「攞到盡」，確係迫不得已o架！佢哋嘅「尊貴」，市民應該繼續畀佢哋「亂篤數」！千祈咪學財爺咁鬼孤寒！
南懷瑾話王莽篡位之所以失敗，其中一個主因就係想把私有制變成公有制，結果失敗了。讀中國歷史，失敗了以後，歷史的結論，四個字「民曰不便」。
變革常因「民曰不便」而失敗；習慣了私有，一下變公有了，老百姓反對，反對的原因是不方便。是以，老朽支持「尊貴」嘅議員，繼續行之有效，方便嘅「篤數」──即係「實報實銷」而又不需單據證明嘅「方便」報銷法！「自歌自舞自開懷，且喜無拘無礙」，議員們都係為「自由港」盡一分力啫！自由萬歲，民主萬歲！