政情：接掌兩委會 張宇人頂硬上
立法會財務委員會主席吳亮星早前處理新界東北規劃前期撥款搞到一鑊泡，根據建制派協調名單「梅花間竹」嘅慣例，下個立法年度就輪到自由黨飲食界議員張宇人（Tommy）擔正。不過，原來Tommy仲要做埋食物安全及環境衞生事務委員會主席，尤其財委會復會要處理「三堆一爐」、創新及科技局開位撥款等爭議項目，同一時間做兩個委員會主席，唔知佢會面面俱圓，定係顧此失彼呢？
對下屆財會唔樂觀
Tommy就話會盡力而為，但因為未試過同一時間做兩個委員會主席，好難講搞唔搞得掂，「睇吓我到時兼唔兼顧到，係咪心有餘而力不足」。睇番Tommy首年處理爭議性較大嘅長者生活津貼撥款，最後都順利過關，算係鎮得住個場，但佢就對新一屆財委會情況唔多樂觀，認為就算唔同時做食物安全及環境衞生事務委員會主席，財委會都可以天翻地覆喎。
不過，該黨一向喺支持同反對政府之間游走，好似黨魁田北俊之前就試過喺審議「三堆一爐」時提出中止待續動議，若將來社民連同人民力量「拉布三子」就「三堆一爐」等具爭議項目發動「拉布」時，最終自由黨點樣企位呢？做主席嘅Tommy又會點處理呢？