政情：勞永樂抗逆 靠唱小露寶
從政者最大嘅敵人，除咗金錢利益等誘惑之外，最難打嘅「大佬」莫過於病魔，如果身體頂唔住，多多選票同名利都係徒然。兩年前立法會選舉，勞永樂以獨立身份參選港島區，當時民調指勞醫生有機會贏取最後一席，但佢喺選舉前夕突然報稱腰傷，從此絕迹拉票活動。原來佢當時身體開始唔妥，選舉後經診斷先知身患惡疾，最嚴重試過雙腳無晒力，行步路都好辛苦，要靠一路唱「小露寶」，先可以大踏步「神情確威武」，並靠極高意志力捱過呢兩年人生逆境。
其實勞醫生兩年前選舉報名嗰陣，聲勢已經唔錯，民調排名亦唔差，所以投票前突然轉趨低調，當年都有人懷疑佢係咪被有關人士「勸退」，以免影響大局。但事隔兩年終於真相大白。選舉後鮮有公開露面嘅勞醫生，尋日上電台節目剖白過去兩年嘅心底話。原來當年選舉時雙腳開始軟弱無力，但當時由於個人仍然鬼打咁精神，誤以為只係下半身神經線被壓所致。點知選舉後病情急速惡化，雙腳完全無晒力，睇完醫生至知係患上惡疾。
手曾無反應 如廁要人幫
勞醫生無講究竟患上咩病，但形容神經線「壓住一啲惡性嘅東西」，仲話呢種病如果係三十年前發生，存活率得幾個月，好彩現時醫學昌明，令佢一直捱到今時今日。
雖然幸保性命，但回憶過去兩年對抗病魔歷程，勞醫生都心有餘悸。佢話曾經連續瞓喺醫院四十幾日，最嚴重時試過如廁時隻手無反應，要由護士幫手清理。事後先知護士工作好偉大，呢啲都係佢做醫生時睇唔到嘅。手術後康復期間，勞醫生搬咗去梅窩休養，但行動力依然麻麻，每步都行得好慢，幸好佢天性樂觀又肯變通，諗到用踩單車代步，而行路時就唱住七十年代著名卡通片「小露寶」主題曲，以「大踏步」方式應對行得慢嘅苦況。
稱撰文論時政 治病良方
勞醫生樂觀面對病情，但疾病往往最無情。年初病情開始反覆，仲有少少惡化迹象，好彩佢願意試啲實驗性治療，最近病情有好轉，行路已經唔使用拐杖，相信好快可以游水同踩單車。勞醫生仲有一醫病良方，就係最緊要保持頭腦清醒，所以佢堅持一星期睇一、兩次症，每日寫稿分析政局時勢。人生無常，但只要保持樂觀心境，終能走出困境。