中環出更：學生刪紡織界 辣慶鍾國斌
一眾立法會議員尋日出席第七屆模擬立法會閉幕禮，點評學生撰寫嘅政改方案及模擬法案。有「立法會方中信」之稱嘅紡織及製衣業界議員鍾國斌（Felix），不滿學生喺模擬提名委員會刪去佢所屬嘅功能界別議席，公民黨議員梁家傑於是打蛇隨棍上，叫Felix改去直選。如果叫得Felix直選，咁點解該黨又戀棧法律界功能界別議席呢？
怪醫質疑政府議案兒戲
唔少議員不滿政府年年都喺最後一刻先向立法會提交草案，搞到佢哋成日都要開快車。不過，醫學界梁家騮（怪醫）就質疑政府嘅議案非常兒戲，加上議員並唔係所有政策範疇都識，有時全靠秘書處幫手，先至可以將啲政府議案執到四四正正。
有立法會議員被指為用盡每年酬酢開支，不惜亂開「白頭單」申領津貼。會計界梁繼昌強調，佢每次代表立法會去應酬都會問餐廳攞番張單，每個月使幾多就申報幾多，但就覺得如果要統一議員申領酬酢開支準則，只會加重秘書處工作量喎。
卓妮