中環出更：詩姐施髮術 變身愛因斯坦？
基本法委員會副主任梁愛詩一向優雅端莊，好多時穿中式旗袍款式套裝，兩邊頭髮用髮夾夾實，髮尾卷曲。不過，卓妮前日途經中環太子大廈一間銀器專門店時，就赫然發現正喺店內購物嘅詩姐以新Look示人，除咗執到四正外，最矚目係佢電咗個又高又鬆嘅新髮型，而且仲電得好攣添，似足女版愛因斯坦。
其實卓妮大前晚先喺一個慈善基金會晚宴上遇到詩姐，當時佢仲係以舊髮型示人，估唔到一晚之間就大變身。詩姐話，好鍾意去太子大廈嗰間店舖買銀器，除咗佢鍾意銀器外，亦因為其寫字樓以前喺太子大廈附近，有時喺附近超級市場買食物畀媽媽，有時又會買禮物畀姪仔同姪女。不過，詩姐話由於寫字樓租金愈來愈貴，所以最近就搬咗去金鐘喇！
鍾情銀器 幫襯專門店
雖然詩姐搬咗寫字樓去金鐘，但卓妮前日下午三點鐘又咁啱撞到佢去番太子大廈買銀器。詩姐步入專門店後，店員就好似見到熟客咁，自動介紹啲新貨品畀佢，又攞出詩姐預訂嘅貨品，詩姐檢查完件貨品後就隨即畀錢嘞。當店員包裝貨品期間，詩姐就周圍望吓，又同店員傾偈，顯得非常熟絡，最後店員仲送詩姐離開，成個購物過程不足十分鐘。
詩姐離開時見到卓妮即展露微笑，唔知係咪好滿意件貨品呢？其實過去幾年，卓妮不時見詩姐去幫襯呢間銀器專門店，又去過另一間名牌手飾店買銀耳環，睇嚟佢對銀器真係情有獨鍾喎！
卓妮