中環出更:港商設廠 放眼非洲

近年內地設廠成本愈來愈高,唔少港商紛紛將廠搬到越南、孟加拉等低成本新興國家,但非洲國家亦異軍突起。香港福建同鄉會日前舉行七十五周年晚宴,城中閩籍名人傾巢而出,做高級亞麻紗生意嘅保良局前副主席顏金煒(Albert)亦有現身。Albert話,近日將啟程去非洲埃塞俄比亞考察,事關當地成為全球紡織業嘅寵兒,個個爭相去設廠,所以佢都唔執輸要親自去睇睇。

成本較內地低

Albert喺內地投資嘅亞麻紗廠規模係全國最大之一,為保持競爭力,初步研究過埃塞俄比亞嘅投資環境,當地電力至少比內地便宜三分一,人工亦低一大截,加上貨物入口歐美嘅關稅低,所以好吸引。Albert喺內地廠房工人約四千人,但係訂單爆棚,所以今次就算去非洲設廠,亦唔使削減內地廠規模喎。

忙生意周圍飛

講起做生意,福建幫頭領盧文端兒子盧金榮亦忙到飛起,佢話今個暑假冇打算帶兩個囡囡去旅行,因為近期要周圍飛,負責睇住家族嘅箱包生意,產品包括幫國際名牌生產行李篋。講起揀行李篋心得,佢話首要條件係夠輕身,係咪名牌唔係咁重要。

當日出席嘅名人仲有福建社團聯會主席吳良好、前主席林樹哲等,福建幫僑領楊孫西嘅兒子楊華勇外父莊哲猛、仁愛堂前主席蔡黃玲玲同丈夫蔡金山亦拍拖到場。蔡太同菲律賓好有淵源,唔止老公係菲律賓華僑,亦有好多親戚住喺當地,當晚佢表哥都專程由菲律賓來港湊熱鬧。

卓妮

第一手消息請下載on.cc東網iPhone/iPad/Android/Windows Phone Apps