中環出更：白韞六講唔廉潔 暗寸貪湯
「貪湯」前廉政專員湯顯明被揭發在任期間既收禮、又送禮，外遊次數更多到無倫，除咗搞到自己一身蟻，仲一手令廉政公署聲譽摧毀。接任廉政專員嘅白韞六可能都慨嘆重建形象需時，佢尋日出席一個青年領袖活動開幕禮，致詞時就講到明如果一個人唔廉潔，唔單止影響個人聲譽，仲會損害一間機構嘅形象，莫非佢暗寸貪湯「一粒老鼠屎搞壞一鍋粥」？
籲青年領袖要有誠信
白韞六希望在場青年領袖除咗要有能力，最緊要就係要有誠信，即係要保持誠實、公平、負責任及守紀律，先至可以作為其他人嘅道德座標。佢以七屆環法單車賽冠軍岩士唐，被揭發服用禁藥，以及雅虎前CEO Scott Thompson被揭發虛報學歷為例，印證有違誠信最終都要面對大眾譴責。
其實香港都有好多高官都犯上差不多嘅「罪行」，但白韞六似乎好避忌，引用香港例子時，只係以近日世界盃為引子，講番廉署四年前處理過嘅打假波案件，以及法國一個有為青年見工時只因被揭發曾經搭車唔畀錢，搞到不獲聘用，所以叫大家對誘惑「零容忍」。如果咁容易忍到，就唔會有咁多貪官啦！
卓妮