中環出更：貪曾訪藏勞師動眾
「貪曾」前特首曾蔭權爵士在任時已經常借公務外訪之名花公帑遊山玩水，貪盡海陸空、歎盡省港澳，終於自作孽被廉政公署調查。不過，貪曾卸任後依然死性不改，繼續貪玩貪食，近日佢帶埋太太曾鮑笑薇遠赴西藏，仲獲西藏自治區黨委書記等領導接見。眾所周知，貪曾貪腐醜聞纏身，仲懶理廉署調查四竄，但內地領導竟然勞師動眾，高規格接待呢位「過氣貪官」，好似涉貪受查反有賞咁，同中央宣稱打擊貪腐之風背道而馳，完全係一個錯誤示範。
西藏媒體報道貪曾日前在當地與西藏自治區黨委書記陳全國等領導人會面。雖然會面嘅地方布置莊嚴，似乎係內地接見重要賓客慣常用的接待廳，但貪曾兩公婆的衣着就有欠莊重。貪曾着咗件類似風褸嘅淺灰色外套、白色恤衫襯藍色褲加對黑色波鞋，仲要掛住副藍色防風沙嘅護目鏡喺條頸上；而曾太就着件粉紅色羽絨，隔籬仲擺咗個黑色旅行袋，似去旅行遊山玩水多過見領導人喎。
不過，衣着失禮唔再講，根據媒體短片內容，陳全國發表講話讚揚香港時，貪曾竟然擔天望地，又喺度腳印印，認真冇禮貌。報道仲引述貪曾發言，話佢事隔十年再到西藏，對西藏經濟發展取得顯著成就深感振奮。貪曾又話，會盡己所能將西藏介紹畀香港市民，等多啲港商到西藏投資，兩地青少年多啲交流，達致互利共贏喎。
廉署調查慢 內地接待快
莫講話貪曾係過氣特首，依家仲被廉署調查緊，隨時自身難保，加上佢嘅貪腐醜聞街知巷聞，仲厚顏話幫手介紹西藏畀港人喎，唔知佢用咩身份去介紹呢？分分鐘倒米都有份。香港廉署調查貪曾慢吞吞，內地高官接待貪曾就咁迅速，真係香港同國家嘅悲哀！
卓妮