觀塘：馬路重鋪完 未幾又損毀
觀塘協和街平日車水馬龍，其中和樂邨長安樓對出一段路面更經常出現耗損，「早幾日條路先鋪好，估唔到咁快又凹咗！整完又爛、爛完又整，係咪鋪得太兒戲？」盧先生指道路凹凸不平會對行車安全構成威脅，不滿路政署未有妥善保養。
路政署發言人稱，過去一年曾接獲四宗相關投訴，由於不時有大型車輛使用上述路段，令路面容易損毀。發言人強調，曾於今年六月進行維修，由於該處交通繁忙，路面近日再出現耗損情況，已即時安排重鋪，預計可於短期內完成。
不過，盧先生直言上址路面凹凸不平情況並未改善，「嗰個位根本就成日都凹，整幾多次都冇用！希望向《東方》投訴咗，路政署會睇緊啲啦！」盧又建議路政署加強跟進維修問題街道，保障道路使用者安全。