明天更好基金執行委員會主席陳啟宗（Ronnie）不時發表惹火言論，適逢政府啱啱發表政改諮詢報告，但佢尋日出席理工大學一個國際商界論壇時竟然一反常態，一句都無評論到就走咗去。不過，Ronnie在台上滔滔不絕大談生意經，仲自爆其對手雖然受過高深教育，又打理成千上萬嘅生意，但竟然唔識得管理下屬。究竟有乜事辣慶佢呢？
Ronnie透露，有人曾經想挖走佢公司兩個高層，期間花盡唇舌，有關高層先至向佢如實反映有意「跳槽」。
Ronnie覺得對方表面上同佢老友鬼鬼，但依家又要「挖走」佢啲職員，感嘆對方完全無道德觀念之餘，又唔識得尊重其他人，真係無得救咁話。其實，公司之間挖角係好平常嘅事，而且人望高處，點解Ronnie咁緊張呢？
講開生意，Ronnie大讚中國人做生意非常大方，雖然中國仲係一個發展中國家，但亦係一個充滿機會嘅地方，未來一定會有好大發展空間。