立法會每年暑假休會前都會按照不成文慣例，安排大會、內務委員會（內會）及財務委員會（財委會）三位主席召開年結記者會，講番過去一年發生嘅重大事項，以及展望將來點樣做得更好。
不過，有心水清人士發現，立法會主席曾鈺成及內會主席梁君彥都已經開咗年結記者會，唯獨財委會主席吳亮星（星爺）未開，唔通佢諗住側側膊唔多覺？
星爺冇開記者會，其實係佢周二完會後，翌日已經一支箭跟隨金融界人士訪京，連係咪取消記者會都無交代。消息人士話，星爺唔係唔開記者會，只係諗住遲啲先開啫，但幾時先開就唔知喇。星爺處理新界東北發展前期撥款時「一戰成名」，急急通過撥款更惹來議員提出司法覆核，睇怕佢都大把手尾跟，如果佢召開年結記者會，相信只會做多次箭靶。但唔知佢會等到幾時先至開記者會呢？