政情：項明生回首 嘆繁體字難學過英文
中學文憑試早幾日放榜，旅遊作家項明生（James）當日亦喺社交網站上載廿幾年前、一早發晒黃嘅「史前」會考成績單，原來佢除咗係旅遊達人，仲係「中文達人」，會考中文科奪Ａ（1）冇難度。不過，十六歲先從內地來港、寫慣簡體字嘅James，就慨嘆學寫繁體字仲難過學英文。
內地來港 讀字典突飛猛進
當年James來港一年半，就由原本連廣東話同英文都唔識聽嘅「阿燦」，成功考獲會考Ａ（1）、５Ｂ、１Ｃ佳績，英文科重考後更由Ｃ升呢上Ｂ，叻過唔少本地生。James笑言，當年學英文除咗隨身狂啃英文字典，連落街買支洗頭水，都會擰轉樽身，將洗頭水成分嘅英文譯番成中文再背誦，最後如願升讀香港大學。
不過，James反而慨嘆當年「死穴」其實係繁體字，佢話當年來港冇耐就考會考，結果因為考試寫多咗簡體字，令原本有信心奪A嘅中國文學僅得Ｂ級，舊習慣亦要升讀港大後先真正戒得甩，更笑言至今仲覺得「壽」字好多筆畫好難記。估唔到多年來靠支筆搵食嘅James，成也中文、敗也中文。