政情：議員司機受累做信差
早前反對新界東北發展撥款嘅示威者，接連多個星期五都喺立法會門外聚集，由於當時有唔少議員助理暗幫示威者混入立法會，導致立法會行政管理委員會下達強硬指示，禁止數名涉事議助出入立法會。呢單嘢至今仍餘波蕩漾，因為立法會進一步加強保安，限制全體立法會議員助理嘅活動範圍，連一向係議員及助理交收文件「物流中心」嘅停車場都成為議助「禁區」，搞到唔少議員助理叫苦連天。
據聞行管會一刀切禁止議員助理去停車場，擾亂晒議員同助理嘅工作生態。事關議助除咗幫議員寫稿、度橋外，好多時都做埋「跑腿」，當忙出忙入嘅議員臨時要文件時，助理通常以最快速度將文件拎到停車場，與以車代步嘅議員喺車上交收，所以停車場早已成為議員同助理之間嘅「物流中心」。但係新規定令「物流中心」運作失靈，好多尊貴嘅議員於是叫司機上辦公室拎，聽聞連司機都勁呻，點解要做埋助理份工喎！
不過立法會搞成咁，其實都係迫於無奈。如果當初唔係部分議員助理玩嘢扮傻，幫手偷運示威者入立法會，行管會都唔會出呢招啦！如果有人覺得唔公道，咁不如實施「良民證」制度，邊個議助犯規就禁止去某啲地方，費事連累其他無犯錯嘅議助。
立會請司機 要識揸穿梭巴
除咗加強保安，立法會最近仲招聘臨時司機，合約期只得一年，但就講明要熟悉全港街道路線，仲要識駕駛穿梭巴士。大家冇睇錯，係要識揸穿梭巴士。唔通立法會秘書處有先見之明，預計到未來立法會有更多大型對抗，所以要請定臨時司機揸巴士，一車車咁護送議員離開，等佢哋免受包圍？
秘書處回覆我哋，原來係有立法會司機因事請長假，所以先要急急腳搵人頂檔一年，仲話唔係要請司機運送議員離開喎！話雖如此，但以現時政治生態嚟睇，立法會秘書處諗吓點樣幫班議員安全離開立法會，都不失係個未雨綢繆嘅好主意。