政情：中環出更：法品牌管理 劉展灝讚賞
法國浪漫嘅氛圍及品味生活舉世聞名，早前一眾政商界名人齊齊出席在港舉辦嘅法國國慶酒會，講起香港及法國文化差異，個個都感受深刻。香港工業總會主席劉展灝（Stanley）話，法國人賣嘢重質不重量，好識吊住顧客胃口。
懲教署署長單日堅話，兩年前佢曾經參觀法國監獄，原來法國男監獄有女性懲教員參與管理，但喺香港就冇可能有咁樣安排。
單日堅話，從硬件方面睇，法國監倉同香港分別不大，但係管理上差異好大。由於法國囚犯毋須工作，所以囚犯日常生活好似外國劇集咁，可以與囚友短聚，無所事事時，最常見嘅活動就係健身，所以好多犯人都好大隻。
當晚出席者除咗有劉展灝，仲有裕華國貨後人余鵬春及萬雅珠寶董事兼總經理冼雅恩等人。
做鐘錶生意嘅Stanley盛讚法國自創品牌方面做得好好，值得香港借鏡。佢話香港做嚟做去都係代工生產，而且產品一旦熱賣，往往就大量生產滿足市場需求，唔似法國人重質不重量，好識吊住顧客胃口。
霍震霆與啟山談波經
港協暨奧委會會長霍震霆同二仔霍啟山亦有到場，卓妮見佢哋兩父子帶住對熊貓眼出席酒會，實係通宵睇世界盃決賽喇！
霍震霆笑笑口話，十月份阿根廷將會來香港踢友誼賽，所以自己梗要捧阿根廷場，不過可惜對手德國太強喎！至於啟山鍾情嘅英格蘭一早出咗局，佢留意到法國前鋒賓施馬表現相當唔錯，可惜無緣躋身決賽，惟有寄望佢哋下屆爭氣啲，捲土重來啦！
卓妮