教育局局長吳克儉（吳得掂）又辣火頭！早前教育局成立咗個推廣職業教育專責小組，通常委任呢啲諮詢委員會，最緊要就係四平八穩，所有相關持份者都邀請加入就包無衰，點知小組偏偏獨漏勞工界代表。多名勞工界議員尋日就喺立法會大會質詢吳得掂「不患寡而患不均」，直頭同佢再「開年」。
議員麥美娟質疑，係咪勞工界唔算重要一環，定係話勞工界唔識得推廣職業教育，所以不獲委任？陳婉嫻就話，職業訓練局都有委任勞工界，點解推廣小組就唔使，對此百思不得其解。吳得掂解釋，考慮到專責小組職權範圍係推廣職業教育，所以成員包括職業教育及培訓界、工商界、僱主等，以改變部分社會人士較為側重傳統學術途徑嘅諗法，以及確保職業教育盡量切合唔同行業嘅需要。
吳得掂又話，早前已去信邀請主要工會提出意見，又計劃呢兩個月透過顧問，邀請工會等團體舉行聚焦小組，收集意見，如果有需要可以隨時增加小組人手喎，補鑊意味甚濃。