政情：何民傑疑反圍標「被鎅」
西貢區議員何民傑（Raymond）繼早前有人挑戰佢喺彩明苑業主立案法團主席嘅地位後，尋日再被「鎅」！Raymond尋日朝早收到警方通知，指佢放置喺將軍澳彩明街對開嘅宣傳橫額被人鎅爛晒，部分更連「屍首」都搵唔番。不過，Raymond事後發現被鎅嘅六幅橫額，都係針對佢邀請講者出席反大廈圍標講座嘅宣傳，質疑對方行動係有組織、有預謀，而非無妄之災。
六幅橫額爛晒好肉赤
Raymond透露，五月曾邀請前廉政公署調查主任林卓廷主講反圍標講座，但講座過咗成兩個月，到尋日先有六幅橫額被鎅，似乎唔係「一般人」做。不過，佢對呢啲行為百思不得其解，亦唔知得罪咗咩人，認為對方有咩可以直接同佢講，亦唔怕講白啲，皆因依家六幅橫額鎅爛咗，不但損失二千幾元好肉赤，亦浪費警方時間做嘢喎。案件目前暫列刑事毀壞案處理。