中環出更：被指不莊重 長毛着短褲遭EQ檢舉
天時暑熱，唔少人出街都會着短褲消暑，但在立法會議事堂就未必可以咁着喇。雖然前主席范徐麗泰當年曾裁決着T恤並非唔莊重，但着短褲就未有主席裁決過。話說議員「長毛」梁國雄尋日如常着T恤同短褲出席立法會會議，點知議員葛珮帆（EQ）下午玩突襲，檢舉長毛衣着唔莊重，主席曾鈺成同意，搞到長毛要離場換條長褲，但佢聲言會就此提司法覆核。
立會為衣着爆小學雞罵戰
EQ話一直都冇留意長毛着咩褲，但尋日朝早有市民向佢投訴，話睇電視見到長毛着短褲，感覺唔夠莊重，「有乜理由（着短褲），下次着泳褲，唔着褲都得？」所以向主席提出規程問題。雖然主席叫長毛換番條長褲，但長毛唔肯，主席於是暫停會議。最後長毛屈服換褲，直言係「忍辱負重」，費事嚟緊幾日開唔到會喎。
長毛話立會不應歧視着短褲嘅人，好多港人夏天都着短褲，聲言「人民着嘅衣服係最莊重」，又認為議事規則大過天嘅年代已過去，女議員可以露膝、化妝，男議員都可以，應推廣平權。
長毛返回會議廳後，突然又提出規程問題，話覺得議員梁美芬嘅衣着唔係好莊重，又話周時見到啲女性打扮得妖冶，佢都覺得唔莊重。梁美芬一聽到，即時要求長毛收回「妖冶」兩字，認為係不合理指摘喎。不過，主席曾鈺成就裁決話，並冇聽過長毛指在場議員「妖冶」，所以冇事。堂堂一個議會，估唔到搞到好似小學雞咁鬧來鬧去。
卓妮