政情：蒙德揚想當年讀UCLA的日子
畢業於加州大學洛杉磯分校（UCLA）嘅信興集團副主席蒙德揚（David），近年為母校做咗好多嘢，早幾日仲以半捐助形式借出集團場地畀母校成立亞洲辦事處。講起當年去到UCLA讀書，David話最難忘係有幾百名學生一齊上堂，同香港幾十人一班相比，簡直係不可思議，笑稱感覺好似睇電影喎！
David係電機工程系校友，去年榮獲該校工程及應用科學學院頒授年度傑出校友。佢話，近年香港學生升學選擇多咗，大學之間競爭好激烈，的確少咗香港學生選讀UCLA。所以佢由前年開始就喺母校設立咗個獎學金，鼓勵香港學生前往UCLA進修。
校長來港成立亞洲辦事處
UCLA亞洲辦事處開幕當日，赫然發現David下頷留咗一撮鬍鬚，以全新形象示人。理工大學校長唐偉章都有到場恭賀，而專程來香港主持開幕儀式嘅UCLA校長Gene Block，跟足習俗切燒豬，希望辦事處可以加強同香港及亞洲學生及舊生的聯繫。